kadtong imong pagpatay sa imong kontra

kadtong pagpatay sa imong kontra
didto sa bukid sa kamingawan
samtang siya nangihi og wala
makabantay samtang iyang gibutang
una ang armas sa kilid sa kuna
sa iyang bata nga usa pa lamang
ka bulan samtang ang iyang asawa
nakatulog sa kakapoy sa kagabhion

kon imo lang unta siyang gitan-aw
sa makadyot, bisan og imo lang
unta siyang gipahuman sa iyang
pagpangihi disir siya nimo tirahi
sa imong isog kaayo nga armalite
bisan og imo lang usa siyang
giatubang disir nimo pusila
ang iyang agtang

basin makita nimo ang nawong sa
imong papa o sa imong ulitawo nga
igsoon, basin mahimo kang gawsanon
sa mga gapos sa kasilag sa mga
giway sa kaligotgot
basin og kasokaon ka na nga
mogamit sa bala og paghigop
sa mga sabaw sa aso niini

basin unta og makaingon ka
nga dili ingon ani ang pagpangita
sa atong hulagway
sa atong kagikan
sa atong kaugmaon

basin unta og nalooy ka sa
pagpatay sa miusbong na gamay
nga kalinaw

apan imo gayod siyang gipusil
patay na siya og mikaratil ka og
dagan balik sa imong
balay sa imong pamilya.