mY secreT ponD

ang atong mga baso sa gatas.
ang mga manatad. mga asul nga dagat.
ang atong mga pagpasilong sa mga lunhaw kaayong mga kakahoyan
sa mga punoan sa mangga, og mga dum-on
ang mga bunga sa mga hinog kaayong bayabas
sa tiil sa mga bungtod
ang pagbalhin balhin sa adlaw sa atong mga ayuyok
nga morag orasan
ang mga panganod nga nagpunay og usobusob sa ilang mga nawong og lawas
ang mga kabilin alang kanato gikan sa kalangitan
og kawanangan og ang uban pang mga kagahapon nga
atong gipapahulay sa atong mga dughan
kadtong mga lami kaayong pamation og lantawon
nagpaila kini sa atong kabuntagon
masidlakon, makagagahom nga kita dinhing dapita
mao ang mga dinapit sa katunhayan