og sa dihang nanglupad na ang mga bala
nangita sa mga kasingkasing nga ilang samdan
og sa dihang mitusok ang mga rockets sa
tiyan sa mga kabukiran
og sa dihang nangatumba ang mga kahoy
sa kakusog sa hagsa sa mga botoboto
nangamatay ang mga wala manago
og mibanaw ang daghang dugo
pagkahuman daghan ang nangiyak
og daghan ang gilubong sa mabaw kaayong mga
kinalotan sa apdo sa kapatagan
sa makadyot lang mitugpa ang mga pako sa
agila sa kalinaw og mitutok sa mga saad
nga gitanom dinhing dapita
pagka-awaaw, pagkamalinawon og ang mga puti
kaayong salapati milupad tupong sa mga kalubihan
mipataas pa padulong sa langit
gustong subayon kon tinood ba ang mga panganod
naglingkod ko sa akong bangko nga kawayan
sa kilid sa akong balay nga naharag sa
kapintas sa mga puthaw
sa kabangis sa tutho sa kapalaran
bisan ako nagduda samtang milantaw ko sa langit
tinood ba kaha kanang iyang puti nga sanina?
No comments:
Post a Comment