kinsa ba ang tawo nga walay kasubo?
wala ako mangutana aron mangayo sa imong tubag.
ang akong pangutana usa lamang ka pagpahimangno kanimo
nga ako ania usab sa tumang kasubo nga morag usa ka gamay
nga baroto nga naglutawlutaw sa usa ka dakong lawod sa usa
ka kangitngit nga walay parola og walay makita nga usa ka isla
aron unta kini makadunggo sa kilid sa baybayon sa mga buhi
aron unta kini makig-ambit sa mga unot diha sa gapasad nga mga
balas sa lapyahan sa kadaplinan sa mga kalubihan nga mihalok sa
bulan og mga bitoon didto sa dakong wanang sa kalangitan.
awita ako sa imong mga awit sa kalipay og kon subo ka man usab
sumala sa imong mga sumbingay, awiti na lang usab ako sa mga
awit sa mga kagul-anan kuyog sa mga pag-iyak sa mga gangis
didto sa mga nangalaya nga dahon sa tiilan sa mga kakahoyan
sa mga kagwangan og mga kabukiran. Awiti ako palihog kay basin
ogma dili mo na ako mahikap og makit-an kay sayod ka baya nga
ang kinabuhi sa tawo morag aso lamang sa usa ka gipalong nga puting
kandila sa usa ka malipayong adlawan sa imong anak nga kamagwangan.
No comments:
Post a Comment