ang imong lapokon nga tiil

ang imong lapokon nga tiil
mao ang nagbuhi
kanamo nga imong
lima ka anak
wala kana
namo gipanghimakak
sa atong mga
silingan og mga kaila
og mga paryente,

nagpasalamat kami
kanimo pag-ayo
gipangga ka
namo


apan niadtong
panahon nga
imo kining
gisadsad sa salog
nga bag-o
pa lang namong
gilampasohan og
sinaw gayod kaayo
nga gani makapanamin
kita kuyog sa mga
tiki sa kisame,
dako usab ang
among kahiubos
kanimo

hilabi na kadtong
miabot kang hubog
og imong gisukaan
ang katre ninyong
mama

among giluom
ang tanan kay
amo ka mang
amahan

kaming mga anak
ingon ka
walay katungod nga
imong tahoron
sulod sa atong
balay nga karaan

nga karon naharag
na og sakto ka
wala kami labot
og dili na usab kami
mobalik didto
karong lig-on
na ang among
mga bukog