naghisgot lang ko nga duna koy party nga atenan
karong gabii og duna koy kuyugan nga seksing
babaye nga bag-o lang nakong nakaila nga nakalimot
pod gani ko sa iyang ngalan nga ania nagsige na og
text nganong dugay ko kaayong mikuha niya nga
alas-siete na sa gabii nga ang party baya kuno
magsugod man sa alas sais traynta
didto sa Nirvana,
nagdali kong namutones sa akong long sleeve
nga polo, nanudlay sa akong buhok og mikuha
sa yabe sa kotse, og wala na gani ako
nakapanugon nimo,
nakasabot ka sa akong mga gikinahanglan usahay
apan sa akong pagbalik nga medyo nakainom na ko
og nagsamparay gamay miantog ka sa imong mga
gibati: nganong nagabhian ako pag-ayo? nganong
mag-apil-apil pa niaanang mga party nga dili na
kinahanglan sa akong kinabuhi? nganong malimtan
ang ngalan? nganong ako pa jud ang magescort escort?
nganong makig-relate
anang mga babayeng walay klaro kon mugbo ba
og mga lupad o kaha ba mga dangan sa kalibotan?
Minyo kana siya og minyo ka usab, dili ba
sala ang pagguba usab og laing pamilya?
wala ko mitubag, katulgon na ko kaayo, mora
ka og akong nanay nga dugay na kaayong patay,
og usahay makapangutana ko kon kinsay ka
ba niining akong panimuyo og panimalay
nga usahay usa pa lamang ang akong pulong
ang imo usa ka gatos na man
natulog ko nga wala na gani matangtang ang
mga medyas sa akong mga tiil
ugma magsulti ka. Sulugoon ka lang dinhi
ug gusto nimong mopahawa, dakong abre ang
pultahan aning balaya.
No comments:
Post a Comment