alas singko na sa buntag

alas singko na sa buntag
wala baya usab ako makatulog gabii paghunahuna nimo

miingon ka nga dili ka na usab makatulog kay
anaa ang mga balak nagsinamok sa imong katre

nga og matulog ka na unta anaa sila morag
mga aliwang nga nanaggimok diha sa imong alugnan
og habol

mihangyo sila nga imo silang sulaton
ora mismo gayod dayon

sa kakapoy sa imong lawas og hunahuna
nangayo ikaw og pasaylo kanila
nag-ampo ka nga unta tagaan ka nila og gasa
sa katulugon nga dugay ra nilang
gilimod kanimo

gilultian mo ako sa mga panghitabo
kabahin sa usa ka maanyag kaayo nga babaye
nga taas kaayo og buhok nga nagpaabot sa iyang hinigugma
didto sa tunga sa lasang diin adunay kahoy nga natikwang
og didto siya mipahulay
nahikatulog sa tumang kakapoy sa pagpaabot
og wala na gani niya mahulat pa ang
pag-abot sa bulan nga gidaydayanan sa
pipila ka mga bitoon

gidan-agan baya siya sa usa ka lumo kaayo
nga kahayag nga puno kaayo sa pagsabot
og paghigugma

og dihadiha miingon ka nga gitagbo ka
sa usa ka katulugon nga nagdala kanimo
og usa ka dako kaayong basket nga
puno kaayo sa humot kaayo nga
mga bulak sa kagabhion

pagkaanindot gayod sa bunga sa imong katulugon
nadungog nako ang awit sa imong paghinanok.