mga pagbati sa paglabay sa panahon

mobalik kita sa kalibotan nga itom og puti lamang
kadtong mga yano sama sa mga tsinelas
nga wala nay ganahan nga mosul-ob kay
seguro daan na og luag na usab sa
atong mga lapalapa

sama sa mga katre nga ang mga habol
wala nay laba og ang mga abog haskang bagaa

sama sa lampshade sa kilid sa katre nga dili na mosiga
bisan unsaon pag og tuplok anang iyang switch

sama sa mga carpets nga gipang-agop-op na
og mga bintana nga nagpunay na og panirado

sa mga bungbong nga ang mga pintal nangalangkat na
og sa mga salog nga wala nay silhig og lampaso

sama sa mga lingkoranan og mga lamesa nga
wala nay trapo trapo nga gidalikdik na sa mga agit-it

ang mga pagbati nga wala na mopitik sa atong kasingkasing
sama sa mga patay nga hangin didto sa sulod sa atong kwarto

ang pultahan nga dili na maabre kay ang mga kandado
gipangtay-an na og ang mga yabe nga ambot og dis-a na
nato nabutang
gamahana gayod diay ang kalimot, di ba?

nganong mobalik pa man kita didto? unsa pa bay igong
mga katarungan nganong kining lugara ato pa mang balikan?

mas maayo pa nga ato na lang kaha kining sunugon
nga bisan ang ilang mga abo dili na nato lantawon

bisan kanus-a pa dili na gayod ako maghandom
sakto ka, kana kana maoy atong buhaton.