ahh, nakahinumdum na ako

ako kadtong naghisgot sa usa ka langgam nga adunay pula nga balahibo sa tunga sa iyang dughan nga morag salin sa dugo nga misiplit human siya maigo sa bato nga gitirador sa usa ka bata kaniya

og ikaw kadtong namati pag-ayo sa likod sa mga naglingkod dapit sa akong atubangan.Ikaw kadtong baga kaayo og itom nga sunglass, nga ang imong buhok imong gisulayan og katag aron matabunan ang imong agtang og ang imong kilay aron unta ako walay makita


ako kang gitan-aw og lahi ka sa kadaghanan kay bisan og ang imong porma sama kanila adunay mga bukton ug dughan kadtong ilang gidungog nga mga lig-on og batikolon, (ayaw lang og kasuko), apan nakita ko baya, bisan sa akong kalayo kanimo, ang usa ka lusok nga luha nga mitulo og nahulog nga imong gidalidali og tago sa imong bulsa.

nadawat nako gikan kanimo ang gamay nga sulat sa pagpasalamat.
wala koy laing ikasulti,
pag-ayoayo higala sa imong pagpanaw


p.s.
og ayaw kahadlok nga ilang
mahibaloan nga ikaw usab sama kanako
kahibalong mohilak sa atubangan sa baga kaayong katawhan
sa walay pagduhaduha sa walay bation nga pagkaulaw