sa sayo sa kaadlawon
nagmata ka, apan ang imong lawas
gustong magpabilin sa habol og ugnan
nanghawid pa ang imong galamhan
sa imong mga damgo nga imong
gihinayhinayan og hapyod
sagad gayod nga ang imong matutukan
mao ang kangitngit og kangiob pa
sa lapad og dool kaayo nga kisame
nagapos pa ang mga pulong sa imong baba
walay litok nga gustong mogawas
og ang imong mga hunahuna nagsigi na og
gimok diha sa ilalom sa imong nagkatuagsa
nga mga buhok.
Unsa na pod kaha ang mahitabo karong adlawa?
Balik sa trabaho sa matag adlaw.
Balik sa mga kisaw sa ordinaryong kalihokan
sa imong mga kamot og mga tiil.
wala nay mga pako. wala na ang mga paglutawlutaw
sa kawanangan, sa mga bitoon nga gusto nimong kuhiton
og sa bulan nga gusto nimong pakigsultihan.
sa imong atubangan anaa ang mga nagtubo
nga mga papeles, mga folders, mga basahonon
kabahin kini kanila og sa mga adlaw og gabii.
ilubong mo una ang imong kaugalingon
sama sa usa ka tinagoan nga sulat nga
ugma na lang nimo basahon pag-ayo.
unya na, unya na lang ang kabahin kanako.
sa pag-abot sa laing gabii, ikaw mahanaw
sama sa usa ka gamayng bato nga imong
gilabay sa tunga sa kangitngit
kahibalo ka nga nahulog didto sa tunga sa mga kakahoyan
apan wala kay plano nga imong kuhaoon pagbalik
og kon imo mang sulayan pagkuha anaa diha
ang imong mga pasumangil: ugma na lang, ugma na lang gayod.
No comments:
Post a Comment