sayon lang ang matawo
sayon lang ang ilang paghimo og pagpagawas nila kanato
sila nga atong mga ginikanan
nga sa gugma nag-umol kanato
migawas kita sa ilang lawas
og mitubo kita dinhi
sama sa mga liso nga gitisok
nga nangahimong mga kahoy
didto sa dako kaayong lasang
gibutang kita sa usa ka katilingban
og diha ang atong pagpakatawo
anaa ang mga salang sulundon
anaa ang mga sala nga atong himoon
anaa ang pagpili sa maayo
anaa ang pagbuhat sa daotan
sayon lang ang matawo
apan lisod ang magpakatawo
mopili ka sa matag adlaw
kon unsa ikaw
hukman mo kon unsa ang hiposon
og unsa ang imong ilabay
molangoy ka sa usa ka lawod sa kinabuhi
gamit ang imong kaugalingong mga kamot
og mga tiil
kon moiyak ka ikaw ra
kon mokatawa ka anaa ra kana kanimo
walay laing makahimo kanimo
ikaw ra
walay laing makatabang kanimo
sa pagpangita sa kamatooran
nga makaayo kanimo
ikaw ra
walay magtultol kanimo kon asa
ang dalan sa pagbalik
kon dili ikaw ra
Apan kon kapoy ka na kaayo
og usahay mawad-an sa gana og paglaom
Ayaw kaputong ayaw kabalaka ayaw kahingawa
Kay anaa ra siya
Nag-atong kanimo
Dili kunuhay mangilabot kanimo
Apan kon madagma na ikaw og masamdan
Anaa siya magdali-dali og patindog kanimo
Agakon ka, gakson ka, og gani iya ka pang hagkan
Gakson ug hugot tungod sa iyang pagmahal og kamingaw kanimo
Tungod kay dili siya makaantos
Nga magtan-aw nga ikaw gisakit og gilutos
Ikaw ang iyang anak
Og siya ang matuod mo nga Amahan.
No comments:
Post a Comment