sa paghigugma anang pagmugna

kon ikaw tinood nga nahigugma
wala na ang kakapoy
wala na usab ang panahon
mamatay ang panahon
dili na gani molabay
sa imong atubangan

sa imong paghigugma sa pagmugna
dili nimo mabati ang kalaay
wala nay mga minuto nga imong matawag nga usa ka adlaw
nawala ang panahon
mawagtang ang gabii og adlaw
mangpungkol ang mga kamot sa orasan

og ikaw malipayon kaayong magpadayon
sa imong pagmugna

kaganiha miabot siya og nananghid
nga aduna siya'y kuhaon

wala ka na makabantay
sa iyang ikaduhang pag-abot og
kataposang pagbiya

wala na ang panahon
og wala na ikaw nga nagmugna
mibalik ka sa imong gigikanan kaniadto
dili ikaw dili ako
ni bisan usa kanato dinhi
wala ang paghawid sa sinugdanan og wala ang pagbuhi sa usa ka kataposan

mobalik ka isip usa ka lingin
na lamang nga

pulong