sa mga butang nga dili bug-at

sa mga butang nga dili bug-at
unsay angayng buhaton?

sama sa balahibo sa manok
dili ba imong tayhupon lang
aron makita nimo kon unsay
mahitabo kon anaa na kini
sa tunga sa hangin?

kanang milutaw na kini
og bisan asa gipalid
og dayon mitugpa kini
sa lugar nga wala
niya gipili

unsay imong gibati


anang lugar nga
wala nato gipili?

sama sa hangin, dili usab kini
bug-at, dili gani nato matimbang
sa atong palad.

sama sa mga butang nga dili kaayo
bug-at, ang mga dahon nga laya
nga gipalid, nga morag giising-ising
sa iyang kapalaran nga mitugpa bisan
asa na lang,

unsay imong gibati alang kanila?

dili usab nato matugkad
dili matimbangtimbang
dili mapriso sa atong
mga tudlo ang kapalaran
ang pagpalid sa mga
gaan kaayo nga mga
butang

sama sa pangisip
wala ka pa ba malisoi sa imong pangisip?
pagkagaan gayod
sa atong mga hunahuna nga naglupadlupad
sa atong mga lawak
gustong mahimong mga panganod
sa kilid sa bungtod

ang akong kalag, kabalo ka
walay kabug-aton.
unsa ba ang angay nakong buhaton niini?