repleksyon

reflect ko ginagmay karon
kon ako isip bana nakasala ba sa akong asawa
nanamin ko sa akong nawong
didto sa banyo kanang ako lang usa
kanang bag-o lang ako nalibang
og nangilo og nanghugas og nanabon
sa akong kinot kanang human na ako
nanabon sa akong tibook lawas kanang
human na ako nanabon kanang ako
nang gitrapohan og tualya ang akong
tanang parte sa akong lawas
kanang gisudlayan na nako ang akong
buhok kanang nahuman na ko og
panutbrush kanang hapsay na ang
akong nawong kanang bugnaw na
kaaayo ang akong ulo kanang
dili na kaayo gubot ang akong
mga panghunahuna

nakita ko ang akong panagway
gitutukan ko ang akong mga mata
gihikap ko ang akong mga ngabil
og aping akong giabre ang akong
baba og gi-check nako ang akong
mga ngipon og alingagngag

wala koy garas ang akong aping,
wala koy pangag og lungag
wala koy bugasbugas wala koy
ulat sa akong nawong
wala gani koy ila og alom
sa kilid sa akong ilong
wala koy ap-ap sa akong apapangig

gitutukan ko pag-ayo pag-otro
kanang dugaydugay na kaayo
kanang miinit nga kaayo ang
exhaust fan sa kasilyas
kanang palong na ang faucet
kanang wala na magtulo ang gripo

gipangutana ko ang akong dagway?
nakasala ba ako kanimo?
nakasala ba ako kanila?
nakasala ba ako sa Diyos nga Amahan
sa Anak og sa Ispirito Santo?

nakasala ba ako sa akong inahan
og sa ilang mga inahan og sa ilang mga amahan?

pagkadaghan sa pangutana, mikunot ang akong agtang
mihiwi gamay ang akong nawong nangita ko sa bungot
nga akong shavon

nawala na ang akong mga dalikdik sa akong mga kamot og mga tiil
wala nay mantsa sa mantika ang akong mga ngabil
wala nay kiki ang akong mga ngipon
wala nay nabilin nga tae sa bowl
wala nay mota ang akong mga mata
nakortehan na ang akong bungot nga kaganiha dunay nanglabaw
naputlan na ang bulbol sud sa buho sa akong galisngag nga ilong

unsa pa bay angayan nakong pangitaon sa akong kinabuhi?
pagkadaghan ba sa mga pangutana mga morag mga dulon nga miatake sa among mga kahumayan kaniadto nga wala madutlo sa pagsunog namo sa daghan kaayong mga sulo
ang mga dangan nga dili bastabasta mopahawa kon dili mahurot
ang ilang gustong kan-on

dili na kana nako tubagon, og kon gusto ka sulayi
og kaligo sayo sa buntag
karong bulana sa tingtugnaw kay ang hangin nga mihilis
sa mga bungtod nga ice sa Siberia nangabot na
dinhi sa among lugar nga gipuy-an

sulayi kuno og panamin kanang ikaw na lang usa
hikapa ang imong kunot nga itlog tan-awa ang imong mikoyos nga oten
dayon tubaga ang mga pangutana kanang prangkaprangka jud
kanang walay dikidiki kanang morag nangumpisal ka sa pari nga Redemptorist nga wala makaila nimo didto sa Sugbo

tan-awon ta og lalim ba.Way komedya.
dili baya usab sayon kon kita magpakalalaki sa atong pagkatawo
dili baya lalim kon ikaw matulog nga utog kaayo ang imong oten
og wala ang imong asawa sa imong kilid kay mibalik sa iyang
mama kay ikaw kuno wala na magpangga kaniya.

dili ko ganahan anang bakakbakak. Og kon unsay naa sa akong hunahuna
ako gayod kanang isulti. Kamatooran man kaha ang imong gusto.
Kagawasan man kaha ang kamatooran?