nagpasalamat ako sa mga balak
nga nakapawala sa akong kalaay
sama lang nga nangawala og nangaputol
ang mga kamot sa orasan nga kaniadto
morag mga pisi nga migapos kanako
og ako nangutana kanus-a ba ang
kagawasan, kanus-a ba moabot ang
akong kamatayon?
karon ang mga oras morag mga patay
na kanako wala na silay kinabuhi
wala magdagan wala magpundo
morag wala na sa akong dughan
ang mga panahon nga manglabay
daghang balak ang maghunghong
kabahin niani, niana, niadto, kabahin
sa mga panghitabo kaniadto nga gustong
magpasubli sa akong panumduman og
tagsatagsa nako silang gihapnig sa
akong mga hunahuna....
ang kaanindot sa mga pulong ang kaanindot
sa ilang mga tingog, ang kahanas sa ilang
pag-abot, ang kalalom sa ilang mga suba
moginhawa ko, mopahulay, modagayday ko
sa ilang mga paglitok, og pagpitokpitok sa
ilang mga balod kaayo nga mga pilok,
pagkaanindot sa mga hulagway sa kinabuhi
kinsa pa ba ang maghunahuna sa mga kagool?
kinsa pa ba ang makahunahuna sa pagbuhat
sa wala pa mabuhat? kinsa pa ba ang ganahang
maghulat sa wala pa moabot? Ania na ang mga
balak og ako gibati sa dakong kahinam.
pagkaanindot gayod, mora bag dili na ako mamatay!
No comments:
Post a Comment