pagkadugay ba

1. pagkadugay bang mopahawa
2. kanang babayeng nagsigig sinyas nga kitang tanan maghilom
3. gikapoy kog pinaabot
4. kon kanus-a nako basahon
5. ang mga pulong nga ania
6. nag-ung-ong sa akong baba
7. gusto nako nga unta iya nang kan-on ang iyang tudlo
8. nga iyang um-umon ang iyang kumo

1. aron mahuman na ang akong pag-antos
2. niining akong kahilom nga pinugos
3. gusto ko nga magtabi ta
4. kabahin sa atong mga balak gusto ko
5. ko nga maghisgot ta kabahin sa mga pagpamulak
6. sa mga panganod og pagpamunga sa mga ulan

1. gusto ko nga magbilar na usab kita hangtod sa buntag
2. gusto ko nga daghang botelya sa beer ang magpasad
3. sa ilalom sa hardin sa atong mga galay
4. gusto ko nga daghan mga sigarilyo nga
5. maupos mapalong diha sa tunga sa atong
6. mga tudlo
7. gusto ko nga masunog ko sa akong kalayo
8. sa daghan kaayong mga kandila sa menteryo

1. gusto ko nga motan-aw sa mga iring nga nangulag
2. gusto ko nga matulog sa akong kakapoy
3. diha sa imong usdong og puno kaayo nga
4. dughan sa kalooy