nakasabot ako sa imong gibati

nakasabot ako sa imong gibati
nalibog ka na karon nganong duha ang imong dunggan
nganong nagkalagyo kini ngano nga ang usa anaa sa wala og ngano
nga ang usa anaa sa too,
dunggon mo ang duha ka tawag
pamation mo kon asa ang tinood
kon asa ang mas nindot

sama usab sa atong duha ka mata
magliraw liraw kini silang duha usahay sa kalibog
asa ba molantaw? sa ubos ba o sa ibabaw?
sa kilid ba o sa tunga? ako ba og siya?
kay dili baya mahimong dunganon pagtan-aw
kay basin og dunay motyabaw
dili sab pwede nga magtagbo
diha sa kalimutaw kay basin og malibat na hinoon ikaw

sama usab sa atong duha ka kamot og duha ka tiil
usahay lain ang gihawiran sa wala og lain usab ang gihawiran sa too
gihikap sa wala ang laing paa gihapohap sa too ang laing dighan
og diha sa ilalom sa lamesa nga gitabilan sa mantil nga pula
lain ang gikuhit sa wala nga tiil lain usab ang gisikaran sa too nga bahin

nakasabot ako sa imong kalibog kay gikan na ako dinha
ayaw kaulaw ni ayaw kapungot lisod gayod sabton ang gugma
apan ayaw og kabalaka kay ang gugma gamhanan
siya ang magtudlo sa mga kamot nga naglibog
siya ang motan-aw sa mga mata nga naglirawliraw
siya ang motog-an sa tiil kon kinsa ang sikaran og si kinsa ang tandayan.

mam, wala ako miisa sa akong kamot kay dili ako motubag sa imong pangutana.
ikaw ang maestra og ikaw ang angayan nga motubag niana.

nakasabot ako sa imong gibati kay kana sama sa akong nabati.