manuktok

manuktok ka usahay sa pultahan
nga anaay mga tawo
sa sud sa ilang balay apan walay
usa kanila nga mangabre
og ang imong mabati mao lamang
ang dali dali nilang pagpatay
sa ilang mga lamparilya
og kandila

ikaw sa gawas nahadlok sa mga
migukod kanimo
gipangita ka og ikaw mitago
palayo kanila og ikaw mihangyo
sa usa ka pultahan nga ikaw
unta abrihan apan
wala ni bisan usa kanila ang
adunay kaisog pag-abre
og pagpasulod kanimo

pagkalisod sa imong kahimtang,
apan mao kana ang tinood
nga nahitabo nga dili gayod
nimo kalimtan

nasilag ka sa mga pultahan
og sa tibook nimong kinabuhi
wala ka misugod pagbalik
sa pagsulay og pagpanuktok
kay ikaw usab karon
ania, nanirado sa imong
pultahan

walay sukod sa balos
mao kanay imong bahad
sa mga hagdan