kon wala na akoy ikasulti

kon wala na akoy ikasulti
mogawas ako sa pultahan
motan-aw sa mga kahoy
og dayon nakog taghoy

gitawag ko sa akong kahaw-ang
ang hangin aron siya mosulod kanako
og dayon

ako mapuno sa mga pulong sa hangin
nga mosulod sa akong baba
sa akong kasingkasing
sa akong tiyan: busog na ko

nanghambog ko sa tamsi
busog na ako,
busog na ako og nahadlok ang tamsi kanako
misutoy og lupad paingon sa habog nga punoan sa tambis

nakigsulti ako sa punoan sa bayabas
kabahin sa iyang mga hinog nga bunga
nga gusto na untang mangahulog
sa yuta

gidapit niya ako nga mokaon
gipanghambog niya ang iyang katam-is og kalumoy
og kahamis

apan mibalibad ako: busog na ako sa hangin,
oo,
sa hangin kadtong mobusog kanato
bisag ang tanan mobiya,
bisag ang tanan wala na makaila kanato,
bisan og ang tanan mangutana
kon makabusog ba gayod ang hangin
kon ikaw nagmasulob-on
og wala nay ikasulti

kon unsa ang imong buhaton
sa imong mubo na kaayo nga kinabuhi.