kon wala na ang mga paril og dingding
unsa na lang ang atong makita?
usa ka nataran nga walay kilid
usa ka balay nga walay utlanan
ang hangin maglapos lapos nianang
kawanangan og ikaw nga maglantaw
mahimong usa ka dahon nga gipalid
nga walay tumong og kapaingnan
naghimo ko og paril sa akong nataran
anaay mga dingding ang akong balay
giputos ko sa panit ang akong lawas
aron mahikap mo ako sa usa ka pagkapkap
aron makita mo ako sa sakto nga lugar
aron ang akong nataran maangkon mo
aron ang akong balay matawag nimo nga imo
aron ang akong lawas masulod nimo
sa imong mga pangagho
aron ang akong mga pulong madungog mo
nga kini gikan gayod kanako, sulod sa akong paril
libot sa akong dingding, ang kaiinit sa akong mga panit
gipailaila ko kanimo ang akong ngalan
mao kana ang utlanan sa akong paril
gisultian ko ikaw sa akong kalihokan
dis-a ako gikan, unsa ang akong gibuhat,
og asa ako paingon, og unsa ang akong mga damgo
mao kana ang akong panit, og ang imong
pagpahawa tungod kay wala ka motoo sa akong
mga utlanan, mao ang tumang kabugnaw sa hangin,
ang pagkapalid sa dingding, ang pagkalukat
og pagkatumba sa akong paril
magtukod na usab ako og balay diha sa mga bonbon
og ang akong mga kahoy mao na usab ang mga panganod
molabay ang tanan, maanod sa usa ka balod ang akong tinukod,
motindog ako. og dayon moambak sa dagat sa akong kamingaw.
No comments:
Post a Comment