kon maglibog na gani ko

kon maglibog na gani ko
og kay ikaw nasuko naman
og dili na motingog nga pangutan-on
natural nga maghilom na lang ko
kay unsa may pulos anang makigsulti
ta sa us ka dakong rebulto
nga mora tag balaanong buang
nga nangitag tingog diha sa
mga amang og bungol og buta.

si mama kaniadto kon mapungot
siya, iya kong bunalan og dako
kaayong palwa nga mabalibali
intawon sa akong gagmay'ng paa

dili ko modagan dili ko motingog
dili ko mosukol igo lang akong
molantaw kaniya nga mora akog
usa ka rebulto sa usa ka santos

sa kadugayan miiyak siya og
nakita ko ang dakong kaulaw
sa iyang dagway. Gihubo nako
ang akong sinina kay ako pa
untang ipabunal ang akong
likod, apan misulod siya sa
iyang kwarto og nanirado

mao kana ang sinugdan sa
akong pagtutok, og hangtod
karon nga kon dunay masuko
kanako, kon ako iyang atubangon
ako lang siyang tutukan kay
sud sa akong dughan wala akoy
sala, wala akoy nahimo nga
daotan nga angay niya akong
kasilagan.