ayaw ka tingala ha
gikan usab ako sa seminaryo
nangalap sa akong kalag didto
sa pagtoo nga ang sulod sa mga lawak niini
sarang makapabugnaw sa nanginit nakong kalawasan
sa akong kabatan-on og kahigal
sa kaisog sa akong mga kamot
sa kalihok sa akong mga mata
og mga tudlo
nahikap nako ang dili pa unta angayang mahikap
sa akong pangidaron
nayagyag ang akong mga gihambin
og nangausik
sa didto na ako sa sulod sa mga altar
sa mga kapilya sud sa nataran
sa seminaryo
wala kaayo nako nailaila ang ginoo
misamot og kainit ang akong lawas
kay ang mga lawak usab
mibukal man sa kainit
ang mga singot sa huerto
ang mga pagpitik sa mga kasingkasing
sa mga talagsaong
makita sa gawas
kay ako nahimong piniriso
napaklot ang akong mga palad
sa pagpaabot sa akong paggawas
sa akong pagkamagul-anon
nagul-an ko
sa akong kagawasan
nga gihandom
nagawsan ko
walay laing gihunahuna
kon dili ang mga tamsi
nga nagtam-os sa mga nektar
sa mga bulak
nahimo akong bulkan
og miboto ako
gipagawas ko
ang tanan ang akong mga lava
ang akong mga kalayo
mabasol mo ba ako sa
akong lawas
nga hinatag man kaha
kini sa atong Ginoo?
gawasnon na ako
morag bao nga gilabay sa dakong lanaw
angkona ako
ania ang akong lawas alang kini kanimo
inday, nganong wala ka man
makapaabot kanako?
3 comments:
Ric,
Imong mga balak akong gipamahaw karon, lami unta'g gainom pod ko'g kape nga akong gi-brew. Naunsa man, nasugdan og basa, dili na man ko kaundang. Namahaw na lang ko nga way kape-kape.
Lubi
pagkape lang pod oi..
maslami baya nga magbasa tapad
kang Rosario
nga magtimpla sa imong kape
ha ha ha
contemporary akong mga balak
moderno
experimental lang kaayo
ambot og makagusto ka
pero kon magustuhan nimo
naa kay
taste.. ha ha ha
Bravo!
nabalhin ang balayan sa kalubihan
naabot ang tagay sa balay ni Ric...
paimna pud ko ug kape...
wapa koy pamahaw
Post a Comment