ang bata

ang kagahapon sa usa ka bata mahimong prisohan usahay
kon dili niya balikan ang mga nangahulog
nga mga gihay sa mga nanglabay nga mga adlaw

kadtong giayo siyag bunal sa iyang tatay
nga morag nakapangutana siya sa bulan
kon unsa ba diay ang tinood nga hulagway sa usa ka amahan?

kadtong wala siya panumbalinga sa iyang nanay
sa dihang gihilantan siya og misulirat ang iyang mga mata
sa taas kaayong kainit sa iyang agtang?

kay si nanay atua sa eskwelahan
kay si tatay atua sa umahan

kadtong mga kanhiay diin ikaw misaka sa taas sa punoan sa santol og didto ka mihilak og mihagolgol

kadtong gusto nimong malumos sa dagat sa imong
kahiubos

kadtong gipaluhod ka sa ibabaw sa mongos
og gipadupa ka sa atubangan sa init kaayong adlaw

kadtong napudpod ang sanga nga bayabas
nga gihampak sa imong mga bitiis og sampot

kadtong wala ka na makasabot sa ila kunuhay
nga pagpangga kanimo

ikaw ang anak sa tanang amahan
ikaw ang kamanghoran sa tanang mga inahan

wala sila makasabot kanimo
ikaw ang putot nga wala mahimong bulak
nga wala mahimong bunga
wala mahinog kay sa imong pagkahingkod
ikaw nahulog.

tungod kanila, wala ka mamatay.
wala ka magpakamatay.