kalibog sa sayo sa kabuntagon

sayo ko nga mimata
wala ko mamilo sa akong habol
nalibang ko og sayo
gi-flush ang tae sa bowl
wala ko manotbras
og dili ko mamahaw
wala koy gana
nga mogawas og
molantaw sa pag-abot
sa adlaw o pagsilip
man lang sa mga bulak
sa iyang hardin
tag-as na ang akong
balbas og nag-wild na
ang akong bungot
dili nako kortehan
kapoy og pangita sa gunting
wala na ko kahinumdom
kon asa ko kini gitagoan
dili ko mag-shave
dili ko manghilam-os
dili ko maligo
dili una ako moinom
og kape sama sa akong
naandan
dili lang ko ganahan
dili ko manudlay karon

gusto ko nga hugaw ko tan-awon
karong adlawa
akong lalison ang
kalimpyo sa mga mabaw
kaayo nga nga butang

protestahan ko ang mga naa sa ibabaw
akong ipakita nga lahi
ang kalimpyo dinha sa
ilalom sa akong kasingkasing