Jesuit House, Baguio City, 1980

ang akong nahinomduman
mao lamang ang kusog kaayo nga ulan
og ang kusog kaayo nga hangin
nga nakapatumba pa gani sa kahoy nga mahogany
sa kilid sa bungtod

sa dihang gipapahawa ka
giingnan ko ni Fr. Mak nga ikaw kuno misyagit
nga gustong moambak sa bintana
human sa pagkahilom nimo sud sa
napulog tulo ka mga adlaw

wala ako masayod niana
hangtod na ako na usab ang mipahawa
giihap nako ang mga dahon
nga nangahulog
nanago silang tanan
didto sa baga kaayong gapnod
nakita ko kining tanan
busa gisugid ko kini kanimo

kay sayod ako nga dili na kita magkita
og kon magkita man ugaling kita
og magtagbo diha
sa usa sa mga sako nga dalan
sa Manila
sayod ako nga dili ka na
makaila pa kanako