hagdan hagdan

hagdan-hagdan ang atong kinabuhi
walay moderetso sa taas nga ang-ang
magsugod gayod diha sa kinaubsan
diha sa yuta
diin nato ibilin ang atong mga tsinelas
nga og disir kita mosaka
mamahid una kita sa mga buling
og hugaw nga anaa sa atong mga tiil
itaktak ang mga abog sa atong mga lapalapa

unang ang-ang
paingon sa ikaduha
hangtod nga wala na nato mabantayi
nga anaa na kita sa habog nga mga ang-ang
sa atong kadaugan

og manuktok na usab kita sa pultahan
aron sudlon ang laing lawak
wad-a ang kahadlok
kay kon ang imong kasingkasing putli
og mahigugmaon
ipasalig ko kanimo higala
nga ikaw ila ng giandaman na
sa usa ka pista

pasudlon ka
pagkpakan human pagpaila sa imong ngalan
og ibutyag nila
ang imong mga maayong mga binuhatan
samtang didto ka pa sa kinaubsan
sa yuta

usa ka na sa mga angayan nga magpuyo
sa ilang pinuy-anan
wala ka gani masayod
nga ikaw usa na diay sa pipila ka mga pinili
nga angayan nga makigsalo sa ilang pagpangaon
nga moinom sa ilang mga bino
sa usa ka baso
nga ilang gipahimo alang lang gayod kanimo

nga makigduyog kanila sa ilang kasaulugan
sa mga maayong binuhatan
og mga balaanon nga panglantaw

maayong pagsaka maayong pag-abot
maayong pagpuyo

kanimo higala.