gusto baya usab nakong sulaton ang mga sugilanon
og balak kabahin anang mga kalipay
sa amahan og anak
og aron nako kini masulat pag-ayo nga kanang
puno sa kamatooran og sakto nga mga bulok
akong gibalikan ang mga dan-ag
sa akong kagahapon
si Papa sa dihang nahalinan sa iyang pipila ka
sako nga copra nangompra og daghan kaayong
pan og kami iyang gipanawag og gitagaan
sa dagko kaayong mga ensaymada
namalit usab siyag dagko kaayong mga isda
og iyang giluto ang lami kaayo nga eskabeche
nag-ihaw siya og dako kaayong baboy og
iyang gihimong humba og adobo
og iyang gitunol kanako ang usa ka dulaan
nga helicopter nga adunay nylon sa kilid
nga og akong birahon
molopad dayon ang maong dulaan
nga mora gayod siyag tinood
nagdula ko sa nataran og iya akong gilantaw
as tumong kahimoot og
dili ko gayod kadto malimtan
og dayon niyag kugos kanako og iya
akong gibutang sa akong lingkoranan
atubangan sa daghan kaayong pagkaon
sa among talad kan-anan
iyang ginusnusan og dugo ang akong agtang
giporma og krus og dayon siya miingon kanako
"happy birthday anak!"
og kanang hitaboa ang dili ko gayod
malimtan og kadto nakapuno kaayo og
kalipay sulod sa akong dughan
dunay larawan nga akong gihipos
nga kaming duha didto sa usa ka parasan
sa didto kami sa Cebu kaniadto
itom ang iyang jacket og stripe yellow ang akoa
og kaming duha puros nagpahiyom
og si mama ang nag-click sa camera
mao kana ang akong kaniadto nga lain
na usab nga gipanghimakak ko kaninyo.
No comments:
Post a Comment