asa ang pultahan sa langit?

asa ba ang pultahan sa langit?
naa kana sa imong kasingkasing

asa ba ang pinuy-anan sa Diyos?
naa kana sa imong kasingkasing

asa ba ikaw mopaingon karon?
pilia ang pinuy-anan sa Diyos

didto ka padulong ayaw pagtipas
padulong ka sulod sa imong kasingkasing

didto ang pultahan sa balay sa Diyos
og didto ka usab magpuyo og didto
ka usab mopauli: tan-awa,kon nasayod

ka lang unta niini kaniadto pa, wala
na unta nimo kinahanglana ang pagpanaw
pa sa mga halayong dapit og pakigkuyog
kanila nga mga buta, bungol og mga amang.

panggaa, hinonoa, ang imong kaugalingon
sama sa imong pagpangga sa imong igsoon,
sa imong silingan, og labaw sa tanan
ang imong Diyos ng bugtong
nga sa kadugay sa panahon anaa ra man
diay gihapon sa sulod sa imong dughan
sa sulod sa imong kasingkasing nagpauraray.

Tinood gayod ang atong nakita: pagkalayo
ra gayod sa mga bitoon og adlaw og bulan
pagkalayo gayod sa mga kawanangan og
mga kometa og mga daghang planeta

kadaghan nga nausik sa atong panahon sa
atong pagpangita sa atong Diyos nga wala
diay magpuyo didto sa ilang mga gitukod nga
mga langit, mga dagko kaayong templo og
mga tore nga gading og mga altar nga bato.