ang dili pagpugong sa pagpanaw

lisod ang pagpanaw nga pag-inusara
apan anaa ang kagawasan
sa pagdawat nga ang tanan
ato na lang gayod nga pasagdan
kon asa sila dalhon sa ilang kapalaran

dunay dili na nato mapugngan
ang kamatayon sa minahal
nahuman na kadto
aduna nay mga bulak nga nanubo
sa kilid sa ilang lubnganan

ang imong pagkapakyas
sa imong mga tinguha
ang wala nimo makab-ot og makuha
aduna ka pa bay mahimo niana?

dili baya usab sayop ang pagpasagad
kanang ato na lang pasagdan
ang pagpanaw
ang pagpahawa og
ang pag-abot

kanang atong gihimo nalang
nga lantawon ang tanan
sama sa usa ka butang nga
haskang gaana nga dili
nato kapugngan
nga molutaw og mosaka
paingon sa mga panganod

pasagdi na lang
ayaw na hilabti
kay ang suba moagas gayod kana
ang hangin molapos sa imong mga panglantaw

ang bulak mobuskad og kini malaya
dili kana nimo kapugngan
kay mao kana ang kinaiyahan

pasagdi na lang ang tanan
nindot baya nga tan-awon
nga sila mamahimong
sila nga sila sa ilang pagkasila

gawasnon, matahom,
dili mahadlok nga moatubang kanimo
wala diha ang pagpanuko og
ang kataha og ang pagngotngot
og pagsakit sa ilang mga lapalapa
og bitiis tungod kay
sila maulaw kanimo

kapoy baya, sultihan tika,
kanang pagpunay og kintokinto.