pagpanghantok

dunay mga kasal nga abi sa lalake
og nakakita na gayod siya sa iyang swerte
og ang mga nananyaw sa dihang
mipaso na ang babaye
sa trahe de boda nga pinalit
sa iyang mama
miingon nga anaa ang nanghantok
nagtagad sa iyang
sungkaan nga daghan
kaayog sigay

nga pagkahuman sa maong kasal
sa pagbendisyon sa pari
og pagkahuman sa dakong hikay
sa kaonkaon og pagsayawsayaw
kudkuron sa lalake ang babaye
sa iyang dagkong bukton
ang babaye aron ihay-ad
sa katre og iya kining
hagkan og ang babaye
mopiyong sa iyang mga mata
apan ang lalake
wala na mag-ambat pa niini

gitan-aw niya ang palibot sa dako
kaayo nilang balay nga pinalit
sa tatay sa babaye
og sa pangpanglabay unya sa panahon
siya ang mahimong hari
sa lapad og lawom kaayo
nga kahaw-ang