kahinumdom ko nimo

nagkita ta sa airport padulong ka sa New York
stop-over nimo sa Seoul,
didto ra ko taman sa airport sa Manila
padulong ko sa Dipolog
nag-estorya ta
dugay
nagkomedya pa gani
ko anang manilaay
wala na ang atong
pagka-serious
hinoon mubo ra kaayo
ang panahon
para mailhan nato
pag-ayo ang atong
kaugalingon paglabay
sa 26 ka tuig.

nakahinumdom ko sa imong thesis sa 1978
sa Ateneo
ang posibilidad nga kon estoryahon sa tawo ang kahoy magkasinabot sila
sa usa ka talagsaong kalinaw

abi nimo gisulayan ko kini
dili noon sa kahoy kondili sa akong palmera
sud sa akong opisina

nindot ang epekto kay ania
bisan pa sa imong gibuhat kanako
kaniadto

ania, nakighimamat gihapon ako kanimo
kamao na diay kong motago
anang kasuko
anang paglubong sa pagdumot
dayon og puli tabon anang hapnig sa usa ka lapad og lalom og dako kaayong pangagho

maayong paglupad, higala,
lami pa ba ang mansanas ni Eba
diha sa Amerika?
unsa ang kapula sa iyang pagkapula?
unsa kasinaw ang iyang kasinaw?
humot pa bang mansanas ang
mga mansanas dinha?
unsa ba katam-is ang mga tam-is
nga itom og mga tapol nga ubas?

unta makig-estorya ka gihapon
sa punoan sa mga kahoy dinha

unsa ba ang kinanindotan
nga kahoy diha sa New York?
unta kana ang imong estoryahon.

kay ugma sulayan nako sa pakig-estorya
ang mga sanga og mga dahon
sa punoan sa among balimbing
tupad sa among nipa nga kasilyas

isunod dayon nako ang mga punoan
sa sampaloc.