didtong dapita

dinhi niining lugara
nagtindog ko sa kakapoy
dili ako mangita anang
ganti sa pagpungko

dinhi niining lugara
nananom ako sa akong mga liso
wala nako handoma
ang pagpamupo

dinhi niining lugara ako nagpuyo
apan walay ako
tag-iyahon dinhi
walay akong angkonon nga akoa

dinhi niining lugara ilang gisangpit
ang akong ngalan
apan wala ako maghandom nga
ilang ikulit kini sa mga bato
aron mamahimong lapida
unya sa akong kamatayon

ania ako dinhi apan sumala pa sa iyang giingon
dili ako para dinhi
og sumala pa usab sa iyang saad
gitagan-an niya ako og lawak didtong dapita

walay ngalan
hingpit
patas
walay ginansya walay alkanse
didtong dapita

nga wala nimo
tuhoi