daghan ang hulma sa mga nawong

daghan ang mga hulma og porma
sa mga nawong dinhi
naay lingin, naay kwadrado,
naay sinug-ang, naay
wow, morag kasingkasing
naay lapad, naay talinis,
naay suwangon, naay bantal,
naa usahay kanang wala ka
kasabot nga morag kagang
nga gakamang, apan
kwidaw ka, mga tawo kana
sama kanato

naay nawong nga sa una
natong tan-aw bation tang
kalooy, naa poy masuko ta
bisag kanang nawnga walay
gibuhat kanato, wala man unta
gani manghiwi, naa poy uban
nga pagkalumo nga lami kaayong
higugmaon bisan kausa lang nato
makita, naay makapabukal
sa atong dugo, kanang morag
tuba sa sugong, naay makapakalma
kanato nga morag nakainom
tag prozac o xanor, naay
makapahubog kanato, naay
mora tag magkalibanga human
og panapat sa pito ka pista
didto sa bohol, naay mga nawong
nga morag ginoo nga gusto natong
luhuran og ampoan, naay nga
nawong nga morag mga bitoon
nga gusto natong hangaran,

sama sa atong mga balak,
og sa akong mga balak nga
(por Dyos por santo nganong
sige man god nimong gibasa)

akong gipili kadtong makapabukal
sa akong dugo kadtong makapukaw
sa akong mga nahikatulog nga pagbati,
kadtong makabayaw sa akong kalag
kadtong mga buhi kadtong imong
(por Dyos por santo
Juice ko Juice ko)
kadtong imong giganahan og basa
kay ako giutgan og ikaw usab
(excuse me excuse you
por pabor perdona mi usted)
nagbasa.