adunay mga handurawan nga mosuyop kanato
sa usa ka lalom kaayo nga buho sa pagbasol
nagpakaisog ako
akong gipakusgan ang radyo didto sa among sala
og namati ako sa mga balita
bahin sa bag-ong patay
kapoy na ang paghimog mga sentimental nga sugilanon
atimanon ko una ang lakat sa akong kinabuhi
wala na akoy labot pa sa akong nahimo kanila
og sila usab walay katungod sa pagpangilabot kanako
daghan pang pungpong
sa mga hinog nga bayabas ang akong pupuon
nangalata na gani ang uban didto sa kasagbotan
tigmi ang kinabuhi kon siging ulan diri sa atong bukid
katungdanan ko ang pagpauga sa akong mga basa nga tsinelas
dili nako makaon ang pagbasol
nakahukom na ako nga modapig sa boto sa kinabuhi
dinhi na lang ako kutob og daghang salamat.
No comments:
Post a Comment