mY secreT ponD

Kwidaw

Kon mamala na gani ang dagat
Og dugay mobalik ang mga balod
Kwidaw ka kay
Basin og tsunami na kana

Bakwit na samtang naa pay
Panahon

Kon maghilom na gani kaayo ang
Kagabhion ug walay ni bisan usa ka gangis
Nga motingog sa kagwangan
Kwidaw ka

Basig mobanos ang usa ka dakong baha
Gikan sa mga bukid basin miboto na ang
Dakong buhawi nga madap-ig sa kilid sa
Iyang dughan

Kon moawo na gani ang daghang mga iro
Og manggawas ang daghang halas gikan sa ilang
Mga langob
Og manglupad nga morag nagsalimoang ang mga
kwaknit
Kwidaw ka

Kay basin moboto na ang usa ka bangis nga
Bulkan nga pila na ka libo ka tuig nga nagdumot
Sa pagpasipala og pagpasagad sa mga katawhan

Bakwit na, luwasa ang imong kaugalingon

Kon mobuswak na sa hingpit ang usa ka bulak
Nga rosas gikan sa usa ka gamay og lagom nga ngabil
Kwidaw

Kay ang sunod niana mao na ang paglaya sa iyang
Mga talulot
Ang pagpangahulog niini sa hilom
Tagsa-tagsa ilis-ilis hangtod silang tanan
Manghay-ad nga mga patay
Diha sa imong tiilan

Kwidaw ka, Alimokon!

Miabot na
Ang imong gihandom nga kamatayon.