abi nimo og sikat ka kay kuno ikaw usa ka magbabalak

ayaw pailad sa imong kaugalingon.
kon moingon sila nga ikaw sikat
(nga ikaw malipayon)
ayaw og too kay
dako kana nga bakak.

abi nimo og sikat ka na
kay kuno ikaw
usa na ka magbabalak sama kanila
diin momata ka sa kaadlawon
aron kunuhay mamati sa mga
tingog og awit sa mga bulawan nga gangis nga
gihimo sa ginoo alang
lang kanimo

abi nimo og usa ka na ka halangdon
nga tawo nga pagapurongpurongan
sa usa ka korona sa kahayag
nga gimugna alang lang sa
bulan og mga bitoon og sa
adlaw og karon
alang usab
kanimo

sayop ka.
usa ka lamang ka magbabalak
og sama kanila
osa ka lamang ka yanong magsusulat
tighawid sa lapis
tigtuplok sa mga letra sa typewriter
tig-gitik og tuplok sa mga simbolo
sa keyboard
sa imong computer
tigpatik sa dugay na nga ania dinhi
tigkutaw sa kape og gatas
og tigsukad og luto og sud-an
nianang mga metaphors
aron sila moanha kanimo

tig-aninaw sa mga karaan nga maanindot nga miginhawa
nga dili imo kay kini sila nauna na
sa ilang tagsa-tagsa ka yugto
og panahon sa ilang
kinabuhi og
pagkamatay

sila nga
nagtikawtikaw na samtang wala pa gani
matawo ang imong mga lolo og lola
samtang wala pa gani
mangulag ang imong
papa og mama didto sa
kamalig daplin sa kakugnan

sayop ka.
usa ka lamang ka tingog
nga dili nila madungog og kon madungog
man ugaling dili gani nila paminawon kay
daghan pa kaayo silag buluhaton niining
atong pinuy-anan

ang pagtanom sa mga lagotmon
ang pagpangisda og pagpamaling
ang pagpamasol
ang pagtikad sa yuta
ang paglakawlakaw aron
pagpangita sa mga liso nga
itusok sa abono nga yuta
ang pagsalom sa mga suba
ang pag-abli sa mga nasirad-an
ang pagtoktok sa mga pultahan
ang pagtukod sa mga pinuy-anan
ang pagsunog sa mga kagulangan
ang pagputol sa mga kahoy
og pagtanom na usab niini
ang paghimo sa mga tulay
ang pagtumpag sa mga pangpang
ang paghimo og mga pader

aron usab
sila mabuhi sama kanimo


sayop ka. usa ka lamang ka tingog
nga molabay. usa ka lamang ka
hapdos sa samad nga dili matambalan.
usa ka lamang ka pangagho og pagmahay
sa usa ka tigulang
nga motapad sa bongbong
og dayon mawala kay gidagit
sa bugnaw nga hangin.

dili ka sikat. tan-awa ang imong
kaugalingon nga migusbat
ang imong gisi nga karsones
ang imong bulingon nga polo shirt
ang imong gidalikdik nga dughan
ang imong kuko nga wala maputol
og bulingon

pangotan-a ang imong silingan og
unsa ang imong ngalan
wala gani sila kaila nimo
bisan na lang sa imong angga

mora ka og iring nga nagpunay
og kawras sa haligi nga dili
maparog og sa kataposan
mikatkat paingon sa atop
sa udtong tutok milantaw
sa mga bungtod og mga panganod
og igo lang nga miingon

"pagkamingaw diay dinhi sa tunga
ug ibabaw sa atop nga sin
pagkainit sa adlaw sa alas dose sa kaudtohon
pagkaalimoot diay sa akong kahimtang
pagkalaay, pagkamingaw sa tibook lungsod nga akong gipuy-an"