Wednesday, November 19, 2008

gipauyonan


lisod kang sabton
mora kag mga buhok sa pukot nga nylon
nga naglisod kog
pangita
asa ang sinugdanan

ang tunga og ang katapusan

apan bisan pa sa tanan nimong mga mugna
nga morag mga tigmo

gisulayan ko gihapon
ang
paghusay sa tanan

kini, kana, kadto, kiri,

gitun-an ko ang sayaw
sa imong mga pulong

akong gihinayhinayan
paghan-ay ang
mga nahisalaag
og kadtong mga
nagtuyoktuyok
akong gipaningkamotan

nga dili malilong og
mahulog
dayon makuyapan
og
mamatay

gusto ko nga buhi lang gihapon
ang tanan

gitunong ko ang akong baba
sa imong
baba
aron ka moginhawa


akong gidap-ig ang akong dughan
sa imong dughan
gipauyonan ka
kay ikaw akong gipangga
og
ikaw misiaw sa akong
pagyukbo
sa bisan unsa nimong gusto


gusto nimong mosaka sa pangpang
gusto nimong mahimo kang langgam
kadtong dagko kaayog mga pako
gusto nimong molupad kuyog kanila
dili kapugngan ang imong mga
hangyo
og sa katapusan

midupa
ka og milupad
nakita ko ikaw nga
nahulog sa
pangpang paingon
sa dagkong
mga bato
nga gisagpa sa
higanting mga balod

og sa katapusan
miginhawa ako og
dako
nga morag naibtan
ako
ug dako kaayong
bukog
sa akong tutunlan

og ako mibahakhak

sa akong dakong katawa
karon nga wala ka na
ako na usab ang molupad
paingon ngadto kaniya.

1 comment:

Balitaw said...

wow!amazing!deep...ipatik sa kabisdak.