kwarta

kwarta lang ang hinongdan
sa pagkagusbat sa atong plantsado
na unta nga panaghimamatay
gibungat mo ang imong kapobrehon
og imo kining gikaulaw kanako
mora ba og imong rason ngano
nga ako imong kasilagan
kay tungod lamang nga
ako nahimong adunahan
sa pagpanglabay sa panahon
diin ikaw nabiyaan nabilin
ka sa usa ka guba nga damgo
nag-antos ka sa mga atop
nga buslot diha sa imong
mga pangagho
nadungog ko kini
nagpamati ako sa imong isulti:
gipameste mo ang mga naasenso,
gipangandoy mo nga unta sila magabaan
og unya sama kanimo maglunang sa kalisod
nga morag mga baboy
sa lapokan nga tangkal
gipangadye mo sa imong
mga gamhanan nga mga santos
nga unta ang among mga panganod
mahimong mga ulan
aron unya kami mahulog og
mokuyog sa panon
sa usa ka suba nga lubog kaayo
nahingangha ako
kanimo nalooy
gani dili lang diay ikaw pobre
sa pagkawalay katigayonan
sa pagkawalay nahot
sa pagkawalay kwarta

sa imong pagkasinahan
og pagkatapolan
ang imong dakong kapobrehon
mao diay ang imong
pagkawalay saktong pamatasan.