Mitubo ang usa ka liso

Pinaagi sa akong lanses.

Migawas ang mga dahon

Niini sa akong mga pagpuyokpuyok

Sa iyang mga lugway

Mibulak kini sa akong

Pagpamakak nga ako usa ka

Hayag nga adlaw

Ang bulak nahimong prutas

Nahinog og kini nahulog

Sa ubos sa iyang mga gamot

Aduna na usa’y laing liso nga

Mitubo sa bag-ong panahon

Mahimo diay nga ang dakong

Bakak makamugna sa iyang

Kaugalingon nga kalibotan

Ang mga bakak mahimo diay

Mga mamunga og kalipay

Busa ayaw og pagtutok

Sa kamatooran kon ang iyang

Mahatag mao lamang ang mga

Kasubo sa uga og laya nga dahon

Ang mga aslom nga bunga

Ang mga sanga nga balikig

Ang mga tagok nga makahilo

‘Te, kon unsa ang makaayo

Sa atong pagpamuyo

Gakson ta.Bakak man kana

O dili.Ang importante lang

Mao ang atong saluhan nga

Kalipay.Ipiyong na lang nato

Ang atong pilok. Dili ba kini

Ang atong buhaton kon kita

Maghalok? Magpauraray.