paranoya

gisulatan ko ikaw sa usa ka mainit
nga pangumusta

nalipay ako nga nakatimaho ako
kanimo sa kawanangan

nangumusta ako sa imong bana
og sa imong mga anak

nga unta anaa sila sa maayong
panglawas og tin-aw og masaaron
nga kaugmaon

mibalos ka sa maong sulat

og ikaw nangasaba og ikaw nanomboy
ngano na ako dugay kaayong mibalos
sa imo kunohay nga kaayo kanako

nga ako kaniadto nakabungat og mga
pulong nga sakit diha kanimo
nga ang atong ig-agaw nga si lauro
walay kaulaw nga nakig-upa sa
ato ra usab nga ig-agaw nga si vivian
didto sa kwarto sa iyang igsoon

nalibog ko kon unsa ang imong bout
ipasabot
nalibog ako kon sakto ba ang akong
pagpangumusta diha kanimo
nalibog ko kon unsa ba ang akong
sala nga unta dugay na man kadto
nga unta dugay na kitang wala magkita

gipaak ako sa mga omang nga imong
gibuhian sa mga tipaka sa atong
kagahapon

halas man diay gihapon ang imong dila
og ang imong mga kamot og kuko
maayo pa man diay gihapon mokawras
morag iring, morag leon,morag tigre

gibalosan ko ikaw nga kon ugaling nakasala
ang buta
pasayloa kay dili kini siya makakita
kon ugaling nakasala kanimo ang
amang
pasayloa kay dili kini kasulti
kon ugaling nakasala man kanimo ang
bakol
pasayloa kay dili kini makalakaw o
makaluhod aron pagpangayo
kanimo og pasaylo

kangilngig ba sa imong mga panglantaw
nawagtang na hinoon ang akong mga kamingaw.