paneguro

segurista ka.
gusto nimo kanang seguro gayod. dili ka gusto og sipyat.
wala kana sa imong bokabolaryo. kanang basin.
og hapit unta.
dili ka gusto nianang klase nga sitwasyon.

gusto nimo hingpit.
hingpit nga kalipay.
hugot nga bakos.
singsing nga sakto gayod og sukod
kanang igo gayod sa imong tudlo.

kon molakaw ka sakto ka gayod sa oras.
walay kulang. walay sobra. dili sayo. dili late.
istrikto ka sa kinabuhi. dili ka gusto anang dula-dula.
kanang duha-duha, masuko ka ana.

gusto nimo kanang tininood gayod.
gani kon magkomedya ko masuko ka dayon
og imo kong sudyaan og mopranka ka
nga dili ka gusto anang puyok-puyok.

kanus-a ko ba nakita nga miagik-ik ka og katawa?
kanus-a ba nga misayaw ka og tango og chacha?
wala ko kahinumdom.

sa dihang gipangutana ko ikaw
kon kahibalo ka ba nga mosayaw
mitubag ka nga ang imong mga tiil puros walhon.

basin kahibalo ka mokanta og Betols, o dili ba sa Carpenters,
o Cat stevens

nagmug-ot ka dayon og miingon
galangan-langan lang sa oras kanang kanta kanta.
Yabag ka diay.

nangutana ko kon nahigugma ka na ba.
kanang tinood jud nga gugma.
kanang morag mipaspas og tuyok ang imong kalibotan.
kanang namulak og pink ang tanang mga harden
kanang gusto kang moambak sa suba
kanang gusto ka nga manghatag sa imong mga tinagoan
kanang gusto nimong iyagyag ang imong mga sinugong

miingon ka, natural lang.
naibog.
nakabungat.
naka-score.
pero walay diki-diki mitaas ang imong kilay
nga wala kay plano nga magminyo
kay kapoy og buhi
anang dili nimo igsoon o paryente.

dugay na ang panahon.
karon patay ka na.
ania ako dinhi sa imong pantyon,
nagdagkot og kandila.

ayaw lang og kasuko ha.
pero dili ba sayang kaayo ang panahon
niadtong seryoso ka kaayo
nga nagpadagan sa kangga sa kinabuhi?

tan-awa nasungagan ka hinoon
sa imong kabaw nga talinis kaayo og sungay.

Sayang.