labaw pa sa balak

dawaton ko nga ang imong
mga balak
nakalipay kanako, nakapausob
gani sa dagan sa akong
kinabuhi,
ang akong mata
nga nagmitmit
miabtik
ang akong kalag morag
gibayaw sa langit
mora og naalisdan
ang akong
gabok nga bukog
morag mihugot ang akong
panit
og mibalik pag -itom ang
akong mga buhok

gamhanan ang imong
mga balak

apan ikaw, oo ikaw,
labaw ka pa sa balak

gihagkan ko ang imong
nag-agulo nga mga ngabil
ang imong mga kamot
nangayo sa akong panabang
miluhod ako kanimo og
napuno ako

ikaw, oo ikaw, bisan og
wala ang mga pulong
naundan ang akong
kahaw-ang

mibalik pagtuyok ang
miundang kong kalibotan

sa imong tutok lamang
nangaputol ang akong mga gapos
sa kong mga kamot og tiil

sa imong paghahohap sa akong buhok
nangaputol ang mga rehas
sa akong prisohan

ikaw, oo, ikaw, labaw ka pa
sa balak
ikaw, ang lawas,
ikaw, ang kalag
ikaw, ang akong ampoan.