wala sila makaila kanimo
dagko ang imong mga braso
kada adlaw puthaw ang imong giaswat
gibomba mo sa imong mga bukton
ang imong kusog
og imong gitipok sa imong dughan
ang gipangita nila nga
kabus-ok
wala sila makaila kanimo
hilomon ang imong pagkatawo
bisan ganig mapandol dili motingog
usa ra ang imong pulong
og ang imong mga saad
wala gayod sugod masangyad
wala sila makaila kanimo
moinom ka usab panalagsa
sama sa imong adlawan diin
giipis mo ang isog kaayo nga bino
og sila nga imong mga amigo
mitagay og misarasay
gipaila-ila ko kanimo si Linda
nga hamis og paa
nga ang kabus-ok
sa iyang dughan mas labaw pas
bukid sa Bulawan
ang imong mga kamot
iyang gihawiran
og mipahiyom ka
og gikidhatan ka niya og
migawas ang iyang dila nga
morag bitin nga puwa
nga naglagiti nianang
lala sa kaulag,
tungang gabii na
og dunay miabot nga batan-ong lalaki
gitawag ang imong ngalan
og imong giabrihan ang pultahan
sa imong balay nga abi kog
ikaw lang ang nag-inosara
milabay ang batan-ong lalaki
og mideretso kinig sulod sa imong kwarto
og imong gibuhian ang kamot ni Linda
og miingon ka nga
nahubog ka og
katulgon ka na kaayo og
nga kami ni Linda og ang imong mga
higala
mamahimong mopauli na
ako ang nakaila na kanimo
No comments:
Post a Comment