pili asay maayo sa duha

kulungon iyang buhok
nature lang
gipangita ang bugnaw
kanunay
nga aircon sud
sa opisina

dili mogawas
kay init
nagbasa og bisaya
og komiks

ang usa tugsoy og buhok
mubo nga pinapook
manghod sa opaw
kiang kiang molakaw
apan gustong mogawas
kay mas ganahan sa
kabugnaw sa silong
sa karaang akasya
sa plaza

nagbasa og
The Mindanao Observer
nakighalobilo sa
mga mayukmok sa
katilingban
naghisgot sa bag-ong gitaban
kinsay gitakbas
kinsay gipatay sa
lagyong barangay
ning mingaw kaayong lungsod

pagkaoran-oran kuyog sa
iyang mga berks
mobalhin sila sa merkado
magsumsum og
sinugbang baboy
og mag-inom anang
tuba nga bahal

ang kulungon og buhok
sa alas singko
untop mo-time out
walay tingog tingog

ang tugsoy og buhok
nanimahong tae
ang ilang mga buhakhakhak
morag mga
kahoy nga milagapak
sa kilid sa baybay
niining lungsod nga
haskang pobreha

kabawo ko
nakapangutana ka kon unsa
ba gayod ang akong
bout ipasabot?

wala.

gisugiran lang ta ka
kabahin niining lungsod nga haskang mingawa

ang hubog
tugsoy lang gihapon ang buhok
anaa intawon nakatulog