pag-abot sa kaanyag sa kaalam

sa kahayag anaa ang mga dayag
sa dayag anaa mawala ang
kahadlok
og kon wala na ang kahadlok
mobanos na usab ang
kalaay
ang kalaay mobaha
maghimo og dakong sulog
og daghan ang maanod
mga kamot nga nangaliyupo
mga baba nga
nanyagit sa panabang
adunay mga gagmayng bata
nga nangamatay og
gitulon sa mangtas nga
suba
nakita mo ang imong hinigugma
didto nga wala motingog
naunlod
og kini gipakita kanimo sa
kahayag
miiyak ang mga panganod

naglingkod ang kalaay
og nangandoy kini nga mabuta
aron kuhaon og balik
ang pagpakahilom diha
sa kangitngit
ang kangitngit mipahiyom
sa pag-abot
sa kaanyag sa kaalam

ikaw ang nag-ingon
nga dili ka duawon sa katulugon
kay sakit sa mata ang kahayag
og busa
ato usa kining palungon