miabot kini siya sa kaadlawon
bag-o pa akong mibangon
nanglugod pa ko sa akong
mga mata og
giinat-inat pa nako ang akong
mga bukton
gituyok-tuyok nako ang akong
mga tiil
og mihanggab kog lalom
anang presko nga
hangin
miabre ko sa computer
akong gihan-ay ang akong mga pulong
kabahin kanimo
og kanako
daghang mitumaw nga makalingaw
ang mga sulat nila
ang ilang mga hudyaka
ang ilang mga sugilanon
sa halayong mga lugar
naglamog ang kabugnaw og kainit
ang akong utok nakutaw
naglibog ka kon naunsa ko
nga wala naman ako maghisgot anang
mga ginagmay
nga tinood
nagplalutaw lutaw ko sa hangin sa mga
"generalizations", wala nako tukia ang mga
"particulars" nga unta maghatag
og "colors" sa akong
nindot og sakto og klaro nga panultion
mga panganod lamang, mga driftwood lamang
mga hunghong nga nagtintal nga gustong madungog
naghatag og mga intriga sa akong
tangkag nga dalunggan
nawagwag akong buhok
mialsa ang akong kilay og ang akong tiil gustong
mokaratil og dagan
pauli sa among balay
sa dihang misyagit na gyod ka
nga sa kadaghan sa akong mga gipang-antog
diha sa hantakan
wala na nimo makita kon hari ba o kulob
walay midaog, pulos pildi, walay pulos kining atong
dula sa mga pulong
adunay gusto isulti pero pinaagi man god sa mga sambingay
og ikaw gikapoy na pag-ayo sa mga latos sa kagahapon
og ako usab gusto na nga mopahulay
sigi akong panug-ab, baho na kaayo ang akong mga utot
gusto na nakong mag-undang aning pamotbot
mikatawa ka, gikuha mo ang mga bakak, imong gibalibali
giutingkay, gihikaphikap og gisimhotsimhot, kay sayod ka
nga sa gipangtuali, ana pa diay ang matood nga nagpahipi.
kahinumdom ka pa ba nga didto ta sa bukid
adunay gitabonan sa mga langkay: hinog kaayo nga nangka.
No comments:
Post a Comment