ang atong panan-aw

pagkadaghan gayod sa mga butang
niining kalibotan ta
nga dili na unta nato sabton
kay kini ato lang mang
amomahon

kining akong pagpatong sa akong
kamot sa ibabaw sa imong
dughan
ako lang kining gibati
wala na kanako ang pagsabot kon
kini makasakit ba sa akong
kasingkasing
pagkaugma

ang pag-abot natong duha sa atong
mga damgo
wala na nato lantawa ang umaabot
og ang mga tunob sa atong mga tiil
wala na nato kini panumbalinga pa

ang kaanindot sa kainit sa adlaw
nga daw alibangbang nga mibatog sa
atong mga buhok
mao lamang ang atong panan-aw
ang uban ato na lamang
nga gipalabay sama sa mga
hangin
og sa ilang mga hungihong