giganahan siya anang bag-o na usab
nga pagsugod
sama nianang bag-ong sambingay
sa iyang balak
kabahin nianang batang bag-ong
gianak sa inahan nga nag-iyak sa
tumang kalipay
samtang ang tatay gibayaw
ang kalag
nga naglantaw
ganahan siya anang pag-usab
sama sa pagtastas sa sidsid sa iyang sayal
aron kini patas-an
sama sa iyang kinabuhi nga padulong na
sa gikahadlokan niyang kataposan
kay sayod siya niana
nag-ampo nga unta patas-an
sa Kahitas-an
apan wala na siya'y mahimo niini
nahisulat na sa palad og ang nahisulat
nahisulat na og dili na
mausob
gusto niyang sugdan pag-usab ang iyang
pagsugod sa usa ka panaw
balik og sakay niaang barko nga bakakon
nga nagpiyong ang mga mata
samtang naglawig sa lawod
nalooy ako kaniya
apan unsa ba'y akong mahimo nga sama kaniya
usa lang usab ako ka ordinaryong tawo
apan aduna'y asenso ang iyang kausaban
nabantayan nako nga
wala na siya mosakay anang iyang
paborito kaniadto
kadtong sapoton og siging suko
og gaalburoto nga
habal-habal
No comments:
Post a Comment