usa ako ka suba

usa ako ka suba
og ikaw usa ka babaye nga naghubo tupad kanako
imong gikuhit sa imong tudlo ang akong dughan
og ako nagigkan

sa pipila ka balod nga mibalos
og dagan diha paingon sa imong mga paa,
og sa atong pagtinutukay
mikinto ka nga mitusno kanako
og ako mibula sa usa ka gana
diha kanimo

misalom ka
ang akong mga balod
nahimong mga gagmay nga dila nga nanilap
sa tanan lawak sa imong lawas,

og ikaw misalom sa akong kalalom
og misulod ka sa akong baba
og mipuyo ka sa akong kasingkasing,

apan sayop diay ako,
kay sa dihang imong nabantayan
nga ikaw gigakos og hugot sa akong kamingaw,

mitunga ka sa akong tungatunga
og miginhawa ka
og dako
samtang imong gikupsan ang imong buhok
sa akong mga bula og mga pinisik,
nahumod ka sa gapos sa akong lilo,

og mitan-aw ka pag-usab kanako
sa usa ka duda,
og midalidali ka og tindog,
dagan, nagpalayo kanako

subo ang akong mga isda
og ang akong mga kabatoan misamot
og kahilom.

ikaw na gayod unta ang ilang giila
nga mopangga kanila,
apan sayang lang ang tanan
nga akong giandam alang kanimo.

Usa ako ka suba,
usa ka subo nga suba,
og ikaw ang babayeng naghubo sa akong atubangan,

misalom ka kanako
apan karon nagpalayo,
kay usa lang ako ka suba,
og ikaw usa ka babaye
nga walay salig sa kainit og kalinaw sa akong tubig.