ang magtutudlo

lisod nimong tudloan ang usa ka
magtutudlo
lisod sabton, lisod kaayong tul-iron
ang iyang bukog nga kanhiay rang
nabalikog,

kay kon ang magtutudlo usa ka buktot
isangyaw gayod niya nga ang
tul-id nga bukog usa ka dakong sayop
sa kinaiyahan

kay kon ang usa ka magtutudlo usa ka
hubog diha sa gahom
og sa pagtoo nga wala na siya'y angayan
pa nga mahibaw-an
o tun-an
nan, ang kalibotan nga wala magsarasay
usa ka dakong lamat
og ang mga ubos kaniya
gihimo niyang tumbanan sa iyang mga tiil
gipakisama nga sagbot
nga angay niyang dauban

pagkamakalolooy gayod sa usa ka magtutudlo
nga dili na magpatudlo
siya ang tinood nga sayop sa tibook kinabuhi
sa tawo dinhing lugara

usa siya ka adlaw nga nagsigi na lang og silang
wala na kaniya ang pagsalop
usa siya ka bulan nga nagpunay og takdol
wala na ang pagsubang
siya ang dagat nga pirming taob
og dili na gayod nato makita pa ang mga kinason
wala na kita'y madawdaw
wala na kita'y makaon

wala ka ba kaha masayod nga ang usa ka magtutudlo
usa man lang ka dalan
diin molabay ang mga gipangita
nga siya usa lang ka agianan
sa mga pinili sa kapalaran
nga siya usa lamang ka mananabang
nga tigpaanak niadtong mga buros
sa mga bantogan nga alinghuna?

sa tinood lang ako usa ka magtutudlo
og sa kadaghanan ako ang miangkon
nga wala ako'y nahibaw-an

nga ako usa ka mala nga basakan
nga ako usa ka hunasan
nga ako usa ka atabay nga namad-an
nga ako usa lamang ka sulugoon sa kabayo
nga dili gayod nako mapugos sa pagpainom
sa tubig diha sa tin-aw nga sapa
og pagsabsab sa kumpay diha sa
daplin sa mga suba

nga ako usa ka gamay nga bata lamang nga nagtam-os
sa akong tudlo
nangutana kon ngano ba nga ang kahibalo mismo
wala na may nahibaw-an